Epic Games-ი AI-ზე სრულად გადადის: Disney-ს პროექტი გადაიდო

Epic Games-ი ვიდეოთამაშების წარმოების სტრატეგიას რადიკალურად ცვლის და Walt Disney Company-სთან კოლაბორაციით დაგეგმილ მასშტაბურ პროექტში „AI-first“ მიდგომაზე გადადის. Unreal Engine-ის შემქმნელი კომპანია გეგმავს, მომავალი შუტერის (shooter) მთლიანი პროგრამული კოდი და მხატვრული ვიზუალი ხელოვნურ ინტელექტს დააგენერირებინოს.

კომპანიის შიდა მიმოწერაზე დაყრდნობით ირკვევა, რომ დეველოპერები ტრადიციულად, ხელით კოდის წერას პრაქტიკულად შეწყვეტენ. მათი ძირითადი ფუნქცია ისეთი ხელოვნური ინტელექტის მოდელების ზედამხედველობა და მართვა გახდება, როგორიცაა Anthropic-ის Claude. შიდა დოკუმენტების მიხედვით, პროექტში გათვალისწინებულია სამუშაო პროცესი, სადაც ვიზუალური აქტივებიც (art assets) სრულად გენერაციული მოდელების მეშვეობით მომზადდება ადამიანების მინიმალური ჩარევით.

გადადებული რელიზი და შიდა სირთულეები

Disney-სა და Epic Games-ის $1.5-მილიარდიანი პარტნიორობის შესახებ პირველად 2024 წლის დასაწყისში გახდა ცნობილი. თავდაპირველი გეგმის მიხედვით, Marvel-ისა და Star Wars-ის პერსონაჟებით გაჯერებული ახალი შუტერი ბაზარზე 2027 წლის მარტში უნდა გამოსულიყო.

თუმცა, საწარმოო პროცესში AI-ის დანერგვით გამოწვეულმა შიდა რყევებმა, თანამშრომლების დეფიციტმა და სამუშაოების მოსალოდნელზე ნელმა ტემპმა გეგმები მნიშვნელოვნად შეცვალა. ანონიმურ წყაროებზე დაყრდნობით, თამაშის გამოშვება ამ ეტაპზე განუსაზღვრელი ვადით გადაიდო.

ჯერჯერობით უცნობია, როდის განახლდება აქტიური მარკეტინგი ან რამდენად წარმატებული აღმოჩნდება გენერაციული ალგორითმების ასეთი მასშტაბური ინტეგრაცია მაღალბიუჯეტიანი გეიმინგის ინდუსტრიაში.