აშშ-ის სასამართლომ ტრამპის მიერ Anthropic-ის შავ სიაში შეყვანა დააკანონა

აშშ-ის კოლუმბიის ოლქის სააპელაციო სასამართლომ ძალაში დატოვა დონალდ ტრამპის ადმინისტრაციის გადაწყვეტილება, რომლის მიხედვითაც ხელოვნური ინტელექტის მწარმოებელი კომპანია Anthropic-ის ტექნოლოგიები შავ სიაში მოხვდა. როგორც გამოცემა Ars Technica იუწყება, მოსამართლეთა კოლეგიამ ხმათა უმრავლესობით (2-1) დაადგინა, რომ ხელისუფლებას ჰქონდა სრული უფლებამოსილება შეეზღუდა კომპანიის პროდუქტების გამოყენება, რადგან Anthropic-მა უარი თქვა სამხედრო უწყებებისთვის Claude-ის გარკვეული ფუნქციების გააქტიურებაზე.

სამხედრო რისკები და AI-ის შეზღუდვები

სასამართლოს გადაწყვეტილებაში აღნიშნულია, რომ ეს დავა ეხება უპრეცედენტო სიმძლავრის მქონე ახალი ტექნოლოგიების სამხედრო მიზნებით გამოყენების პრობლემას. საქმის განხილვისას გამოიკვეთა ორი საპირისპირო პოზიცია.

ერთის მხრივ, აშშ-ის ხელისუფლება და თავდაცვის მდივანი Pete Hegseth აცხადებდნენ, რომ გადაჭარბებულად შეზღუდული AI მოდელები შესაძლოა კრიტიკულ მომენტში მოულოდნელად გაითიშოს, რამაც მნიშვნელოვანი სამხედრო ოპერაციების ჩაშლა შეიძლება გამოიწვიოს. მეორეს მხრივ, Anthropic-ი მიუთითებდა, რომ AI მოდელისთვის უსაფრთხოების შეზღუდვების მოხსნამ შესაძლოა გამოიწვიოს მოდელის მიერ არასწორი სამიზნეების გენერირება (ჰალუცინაცია) და საბრძოლო მოქმედებებში არასასურველი შედეგები.

კანონის ფარგლებში მიღებული გადაწყვეტილება

სასამართლომ განმარტა, რომ პრეზიდენტ დონალდ ტრამპსა და თავდაცვის მდივანს თავად უნდა განესაზღვრათ, თუ როგორ დააბალანსებდნენ ამ კონკურენტულ რისკებს. მოსამართლეთა შეფასებით, თავდაცვის მდივანს არ გადაუჭარბებია კანონით მინიჭებული უფლებამოსილებისთვის მიწოდების ჯაჭვის უსაფრთხოების აქტისა (Supply Chain Security Act) თუ ქვეყნის კონსტიტუციის ფარგლებში.

აღსანიშნავია, რომ იმავე სასამართლომ ჯერ კიდევ აპრილის თვეში უარყო Anthropic-ის საგანგებო შუამდგომლობა შავ სიაში შეყვანის შეჩერების თაობაზე. ამჟამინდელი გადაწყვეტილებით კი საბოლოოდ უარყოფილ იქნა კომპანიის სარჩელი, რაც მნიშვნელოვან სიგნალს აგზავნის მთლიანად ტექნოლოგიურ სექტორში.