Amazon მონაცემთა ცენტრების სამეზობლოებს $1 მილიარდს გადაუხდის

ღრუბლოვანი სერვისებისა და ხელოვნური ინტელექტის ინფრასტრუქტურის გაფართოების პარალელურად, Amazon ადგილობრივი მოსახლეობის უკმაყოფილების განმუხტვას ცდილობს. კომპანიამ პირობა დადო, რომ მომდევნო ხუთი წლის განმავლობაში $1 მილიარდზე მეტს შესწირავს იმ თემებს, რომლებიც უშუალოდ მისი მონაცემთა ცენტრების სიახლოვეს მდებარეობს.

Amazon Web Services-ის (AWS) აღმასრულებელმა დირექტორმა, Matt Garman-მა განაცხადა, რომ თანხის გადანაწილებას თავად ადგილობრივი თემები გადაწყვეტენ. დაფინანსება ისეთ მიმართულებებს მოხმარდება, როგორიცაა განათლება, პროფესიული გადამზადება, ელექტროენერგიის ტარიფების ხელმისაწვდომობა და ენერგო თუ წყლის რესურსების დაცვა.

ენერგიისა და წყლის რესურსების საკითხი

მონაცემთა ცენტრების მშენებლობა მსოფლიოს სხვადასხვა წერტილში ხშირად იწვევს პროტესტს, რადგან ასეთი ობიექტები უზარმაზარი რაოდენობით ელექტროენერგიასა და წყალს მოიხმარენ. ამის საპასუხოდ, Amazon-მა პირობა დადო, რომ ახალი ცენტრების ფუნქციონირება არ გაზრდის ადგილობრივი მოსახლეობის ელექტროენერგიის გადასახადებს და არ დააზარალებს წყლის მარაგებს.

კომპანიის განცხადებით, მათი მიზანია 2030 წლისთვის მიაღწიონ სტატუსს „წყალ-დადებითი“ (water positive), რაც იმაზე მეტი წყლის ბუნებაში დაბრუნებას გულისხმობს, ვიდრე თავად სისტემები მოიხმარენ. Amazon-ის მტკიცებით, მათ მიერ განხორციელებული პროექტების 75 პროცენტმა ეს ნიშნული უკვე დააკმაყოფილა.

მიუხედავად ასეთი მასშტაბური შეთავაზებისა, მსხვილი ტექნოლოგიური კომპანიების გარემოსდაცვითი გავლენა და რესურსების მზარდი მოხმარება კვლავ რჩება საზოგადოებრივი დისკუსიისა და კრიტიკის მთავარ საგნად.